Barauari Soetan Nasoeha, naie' kumbali inyo kalancang, dibongka sauah, balaie pulo. Dè' lamo lambè' di jalan, kian lamo basarang dake', ko' dake hampie lah tibŏ, tibo di Ula' Tandjoeang Médan. Baru inyo tibo disanan, basuolah ayah dangan bundo, io tuanku Radjo Tuo, io poeti Lindoeang Boelan.
Bakato ayah jo bundo, tagala' sambiě manangih :
"Sikujua di Batang Kapèh,
kambanglah bungo parauitan;
lé mujua kami malapèh,
pulang kumbali kapaui'tan"
Namun sahari-hari nantun, diguguăh tabuah nan larangan, bakurulieng urang samöhönyo. Barauari garan disanan, dipòtong kabau ampè' limo, minta' doa salamat hanyólai. Dè' lamo lambè' nan ba' kian, bakato poeti Andam Déwi : 'Lah lamo kito disiko, manölah guru Boengo Kapèh, mangapo inyo ta' kamari, pai joh kau Kambang Manih, bajalan joh kau kini-kini, japui ka' guru Boengo Kapèh, japui' tabao inyo sakali"
Barauari si Kambang sanan bajalan inyo hanyolai, ka mudie' ka Kötö Tuo, mahimbau poeti Boengo Kapèh. Baru sampai inyo kasanan, lalu naie' kaatèh rumah, batanyö poeti Boengo Kapèh : "Alahmoh datang kau Kambang, kami na' barang ditanyõkan; iölah pulang mandé acie' kau ? Barito sajo nan didanga, antah io antah tido"
Manjawab si Kambang sanan : "Io bana barito nantun, lah lamo baliau pulang; kini hambo kanai suruăh, mahimbau mandé acie' handa'lah datang kini juo.
Lah lamo tida' karimbo,
pandan babuah lah ko kini
lah lamo inda' basuo,
róman barubah lah ko kini !
Ba'itu katonyo tadi"
Mandjawab poeti Boengo Kapèh : "Ko itu nan kau katökan, dangakan pantun jo ibarat
Lah rumi' den kakatalang,
talang atèh pandakian
lah rumi' dèn kamanjalang,
jalan bahambè' jo kulindan"
nankan katonyo Boengo Kapèh.
Kambang babalie lah kau pulang"
Barauari si Kambang sanan, babalie' pulang hanyolai, pulang ka Ula' Tandjoeang Médan. De' lamo lambe' di jalan, lah sampai inyo di rumah, batanyo poeti Andam Déwi : "Mano kau Kambang, O na' kanduang ! Lai tabao nan dijapui' ?"
Manjawab pulonyo si Kambang : "Manolah mandé acie' hambo ! dangakan na' den katökan : "nan dijapui' ta' tabao; bakato inyo dihambo, bakato sambie jo ibarat : Roemi' dèn kakatalang, talang diatèh pandakian; rumi' kini kamanjalang, jalan bahambè' jo kulindan. Itu nan kato Boengo Kapèh; pikieri di mandé acie'.
Barauari poeti Andam Déwi, bakato inyö disanan : "Mano di ana' dayang-dayang ! mari kalian samöhönyö, kito bajalan kini juo, karumah poeti Boengo Kapèh, lah lamo tida' basuo."
Barauari poeti Andam Déwi bajalan turun kahalaman, hiliekan labuah nan panjang. De' lamo lambè' di jalan, hampiě kasampai hanyolai. Lórong de' poeti Boengo Kapèh, manampa' Andam Déwi datang, tasambua darah di dado, disangko diri dibunuahnyo.
Turun bajalan haunyolai, manurui' jalan ka tapian, larinyo lari-lari anjieng, manyurua'-nyuruă': masua' timbo mahiliakan aie nan gadang, sampai kalubua' di Cimantuăng, sampai ka Ula' Pantai Camin. Hilanglah poeti Boengo Kapèh; mati ditangko' rang boenian !
Pinang kale' didalam lurah
Ure'nyo sampai masua' kabun
Kalam patah, dawat tatimpah
Karatèh manyambah minta ampun !
Rami galanggang di Singkuang,
Tampe' bajua bali suto
Ta kasah baragó' lai
Kato putuih hakim lah hilang
Api padam puntuanglah hanyui'
Ta buliah diulang lai !
Kaba Manangkérang tamatlah soedah
Nan banamo si Gairoellah
Ana tuanku Radjo Tuo
Poeti Lindoeang Boelan namonyo bundo.
Tandjoeăng Médan namo nagari
Wakatoe ini tiadölah lagi
Talah mandjadi halalang tinggi
Antaro Solò' dangan Sumani.
Hambo danga barito urang
Parumahan jo lasuăng ado sakarang
Bakèhnyo mandi balunlah hilang
Hanjo manjadi rimbo nan gadang.
Sungai banamo sungai Sumani
Disitulah sumua tampè'nyo mandi
Hanyui'lah mundam si Andam Déwi
Itu mambao' badannyo mati.
Lubua' Bunta urang namokan
Disinanlah inyo disèmba ikan
Dibaonyo lari sampai kalaui'tan
Hinggo tapasah kapulau Sétan.
Laui' Baharullah disabui'kannyo
Danau Singkara' pado sangkōnyo
Di sungai Sumani hanyui' mundamnyo
Dake' Saniengbaka ado muaronyo.
Pulau Sétan nan tasabui itu
Dake' Panyinggahan sudahlah tantu
Pulaunyo kètè' karang dan batu
Balun panah hambo kasitu.
Sabagai pulö hambo kabakan,
Takalo Andam Déwi disèmba ikan
Hidui' kumbali di pulau Sétan
Datang garudo nan malarikan.
Dibao'nyo tabang ka Bahiram Déwa
Poeti Taroeih Mato mamaliarönyo
Hinggo bakawin dangan sudaronyo
Dapatlah ana' Soetan Nasoeha.
Bahiram Déwa namo dahulunyo
Batipuah namo sakarangnyo
Dimano kampuang si Taroeih Mato
Kurang tarangnyo pado hambo.
Tamat ...
Sumber :
Bijdragen tot de taal, land en volkenkunde van Nederlandsch Indie 1885 (Nijhoff, 01-01-1885)
*marjafri - founder komunitas anak nagari Sawahlunto
Tidak ada komentar:
Posting Komentar