Kaba barito nan tadanga, inyo kakawin hanyolai, kawin jo rajö Sonsong Haroeih, mamancang galanggang inyo kini. Mandanga kato nan ba'kian, mupakat Soetan Manangkérang, io jo rajo Kalamkaboei, inyo na' pai kasanan, kagalanggang rajö Sonsong Haroeih.
Bakato Soetan Manangkérang : "Manolah datua' urang pangaie ! carikan kami andalan, carikan ayam aga' sikua, kami na' pai kagalanggang, galanggang rajo Sonsong Haroeih; lórong ayam nan datua' cari, usah ayam nan batuah, nan kahalah akan di cari."
Lórong de tuo pangaie, lah dape' ayam saikua, ayam nan kuyu patah kaki. Barauari Soetan Manangkérang, alah dapè' nan dicari, bajalan inyo batigo, kagalanggang rajo Sonsong Haroeih.
Dè' lamo lambe' di jalan, alah sampai inyo kasanan, kagalanggang Sonsong Haroeih. Namun de' Soetan Nasoeha, lah naie' inyo kagalanggang, héranlah urang samohonyo : Urang dimanökölah ikö ?" Barauari garan disanan, lah tibo rajo Sonsong Haroeih, lah naie' inyo kagalanggang, bakato inyo disanan: "Mano juaro samohonyo, apo sabab balun bapadan, satinggi nangkõlah hari ?"
Namun de' Soetan Nasoeha, bakatö inyo disanan : "Manolah datua' rajo siko ! kamilah lamo dè' mananti, urang ta' bapadan juo, kini ba'itulah dè' rajo, kito bapadan kini-kini, kito manyabuang aga' salapèh" nan kan katonyo Soetan Nasoeha. Barauari rajo Sonsong Haroeih, mandanga kato nan ba' kian, lah bérang inyo disanan, gumanta sagalo sandi: lah lamo galanggang den rami, balun surang nan ba' nangko, balun surang nan malawan den".
Salamo lambè nan ba' kian, dikaca' ayam sikuǎ surang, bakato Soetan Nasoeha : "Manölah rajo Sonsong Haroeih, bakato sambie baibarat : Kayu urang kayi candano, kayu babat manangah rimbo: usah bérang hambo batanyo, ba' apo adat sabuang siko, hambo kamari sakaliko"
Bakato rajo Sonsong Haroeih :"ko' itu nan ang tanyokan, habih gawa de' karilaan, habih cupa' de' palilisan; adat kami di galanggangkö, lari kalah, matipun kalah: pantang maharie' di galanggang ! Ba'itoe adat kami siko."
Barauari garan disanan, dibulang ajam sikuă surang; lah sudah ayam tabulang, taruah batampin hanyölai. Dè' lamo lambè' nan ba' kian, namun de' rajo Sonsong Haroeih, diambie'nyo makanan ayam, dibari makan ayam sabanta.
Bakato Soetan Nasoeha : "Manolah datua' rajo siko ! kami lah lupo katinggalan, kami nan datang dari jauah, makanan ayam ta' babao, kini ba'itulah de' datua', bari padi hambo sadiki'.
Manjawab rajo Sonsong Haroeih : "ko itu nan diminta', tida' bapadi kami siko, kò' datua' na' padi juo, pailah karumah hambo, minta'lah di urang di rumah, sanan padi nan banya', na' kami nanti disikö"
Barauari Soetan Nasoeha, balari inyo kakampuăng, kampuăng rajo Sonsong Haroeih. Baru tibo inyo disanan, alah tampa' bundo kanduangnyö, iolah poeti Andam Déwi, takuruăng dalam karando. Manangih Soetan Nasoeha, malihè' rupo damikian : "Manölah mandé kanduang hambo ! hambo datang kamari nangko, sarato dangan ayah kanduăng: baliau mananti di muaro, sarato dangan mama Gairoellah; den lah pai kagalanggang, galanggang rajo Sonsong Haroeih; alah bapadan kami tadi; kamanyabuăng moh hanyolai, kò' sabuăng sakali nangko, bukan sabuang mancari amèh, sabuang hambo mahadang tingkah, sabuăng mancari gaduah sajo. Kini ba'itulah de' mandé, cubo katōkan pado hambo, mungkonyo sakarèh itu, apo sinjatonyo nan labieh"
Manjawab mandé kanduangnyo : "kò' itu nan ang tanyokan, sabuah karih panda' jao, sahalai padang mutuih rantai, itu pakaiannyo nan labieh" nankan katonyö Andam Déwi.
"Kini ba'itu malah mandé, kò' io itu nan labiah, dima lata'nyo na' dèn lihè."
Barauari Soetan Nasoeha baru dilihè' karih nantun, dipatah-patah patigo, diambie' batu ditòkò'i. Kini ba'itulah dè' mandé, baru tadanga haru di galanggang, sugirò mandé bajalan, balari sajo kamuaro, baunduang-unduangmalah mandé, usah mandé tampa'kan róman."
Barauari Soetan Nasoeha, babalie' inyo kagalanggang. De' lamo lambe' dijalan, lah sampai inyo kasanan, diambie' ayam dibari makan, dirantang lalu dilapèhkan. Alah sabanta ayam lago, lah mati ayam Soetan Nasoeha. Hirui'lah urang di galanggang, sóra' ba' buni guruăh tuhuk, Barauari Soetan Nasoeha kalah, ta amuah batimbang; bakato sambie baibarat : "Sigantang buki' Sigantang, katigo buki' Katialo ; alah den tida' kabatimbang, antah kò' carai lihie jo kapalo"
Bakato rajo Sonsong Haroeih : "Kalah tida' amuah batimbang, tando kacarai lihie jo kapalo"
Bakato Soetan Nasoeha, malompe' sambie katangah : "Manölah datua' rajo siko ! marilah aga' sajamang, kito papasiah-pasiah langkah, kito mambuang kare' basi".
Dè' lamo inyo bagadiah, tabi'lah habu di galanggang, runtuah-runtuăh galanggang itu. Héran tacangang rang nan banya', bakato rajo Sonsong Haroeih : "Kalau den taluă' dè' ang, ta' dèn banamo rajo Sonsong Haroeih"
Manjawab Soetan Nasoeha : "kò datua' ta' mati di karihkö, ta' den bagala Soetan Nasoeha"
Barauari garan disanan, alah bacubo sajamang lai, bapalun hilie jó mudie' tahindèh takasie' bulan. Lah cameh ayah Soetan Nasoeha, balari-lari kagalanggang, bakato Soetan Nasoeha : "Manölah ayah kanduang hambo ! usah ayah rusuah bana, calie'kan sajolah dahulu"
Barauari garan di sanan, taga' taganjua Sonsong Haroeih; baru malangkah tikam tibo, tibo dirusua' jaraja' mudo, mati satikam Sonsong Haroeih. Mangilie darah di galanggang, bakinco jo darah ayam; bangkai tagolè' masuak banda. Lorong de' urang nan banya' tu, manyambah manyimpuah hanyolai, takui'lah urang samöhönyö.
Barauari poeti Andam Déwi, tadanga haru di galanggang, dikupa' pintu karando, diréwai salèndang panjang, balari-lari kamuaro, masua'lah inyo samohönyo, dibongka sauah balaie juo. De' lamo lambe' di jalan, lah talampau Paliang jo Malalo, lah sampai inyo ka Panyinggahan, bahanti inyo disanan; turun kadarat sakutiko, dudua' bahanti atèh tanjuang, bakato sambie baibarat :
Gadang aie Tandjuang Jurahan
Alai dijuluă' jó siraui'
Batuah balai Panyinggahan
Balai manjórò' masuă' laui'.
Alai julua' jo siraui'
Cubada' ambie' jo pisau
Balai manjórò' masua' laui'
Batu taga' bakèh maninjau.
Cubada' kai' jo pisau
Elo' kambangnyo bungo inai
Batu taga' bakèh maninjau
Elo' ranahnyo muaro Pingai.
Elo' kambangnyo bungo inai
Siraui' diatèh banta
Elo' ranahnyo muarò Pingai
Laui' banamo Saniangbaka.
Siraui' diatèh banta
Babuah duku di Nanggalo
Laui' diadang Saniangbaka
Lah tampa' Sumpu jo Malalo.
Bersambung ...
Tidak ada komentar:
Posting Komentar